تعريف الأسافين

مين فينا ما سمعش عن الأسافين ؟؟؟؟ مين فينا ما عمروش أكل إسفين طلع من راسو؟؟؟؟
طيب عمرك فكّرت شو معنى الإسفين...
الإسفين باختصار: هو ضحك بالوجه ومن وراك بيحكي عنك للمسؤول بكلام صحيح أو كذب
وإنتا بتضحك وبتلعب ومش عارف شو بيصير ورا ظهرك....
وشو أنواع الأسافين؟؟؟؟
للأسافين أنواع عدة نذكر أشهرها،( حاول تراجع الأسافين اللي أكلتها بحياتك واللي إنتا ضربتها وشوف بتنتمي لأي نوع)

1. الإسفين الموجّه ويتكون هذا الإسفين من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنتا من شطارتك أعطيته الفرصة ففقعك إسفين محترم
( بصراحة هالشي صار معي شخصيا واحد سلخني اسفين موجه جاااااااااب اجلي )
يلا الله كبير


2. الإسفين الجماعي أو – ملتي إسفين (Multi Esfeen) – وهذا من أقوى الأسافين ويكون مفعوله شديداً وبكون مجموعة من الموظفين بيضربوا موظف واحد... إسفين من الآخر عند المدير... وطبعاً لإنهم جماعة المدير راح يعتبر إنهم صح وإنتا غلط..


3. إسفين متعدد الاتجاه أو – ملتي دايركت إسفين (Multi Direct Esfeen) – وهذا إسفين بتضربه عند مديرك وإنتا قاصد فيه- والنية بالقلب - شخص معين وإنو ما بحافظ على مصلحة الشغل وإنو ضد مبادئ الإدارة وبالجملة بتلطشلك خمس ست موظفين بالمعيّة مش عاجبينك وشايف إنهم ممكن يضرّوك، وهذا يعتبر من أذكى الأسافين لإنك ضربت عشر أسافين بحجر واحد...


4. إسفين الرحمة وهو إسفين نادر تطلقه بحالة تشوف صاحبك تعبان من الشغل ومش عاجبته الشركة والموظفين بيعطوه شغل كتيير فوق طاقته والأخ ممكن من الضغط يروح فيها...فبتروح حضرتك عند المدير وبتلعن سنسفيل أبوه لصاحبك وبتظلّك توزّ عليه حتى يقوم المدير ويقدم فيه عريضة ويكحشه وهيك بتكون إنتا أطلقت عليه رصاصة الرحمة وخليته يقعد بالبيت معزز مكرم...


5. إن دايركت إسفين (Indirect Esfeen):- وهو من أقل الاسافين فاعليّة يصدر من واحد قرفان زهقان عنده مبدأ "عليّ وعلى أعدائي" وبروح على المدير وبدال صباح الخير بحكيلو: 'إنتا لو بتضبّ موظفينك بدل ما إنك قاعد ورا الكرسي، ولك شوف شو عم بصير…' وبتصير تسلخ شمال يمين وإنتا مو عارف ليش أو مين بس كل هدفك تفش غُلّك وطبعاً ما تتوقع الشباب حيسيبوك بعدها لإنك لكشت الكل وما إلك صاحب...


6. ريفيرس إسفين (Reverse Esfeen) :- وهو من أغبى الأسافين يصدر من إنسان غبي تافه معوّق طافي رايح يدق صاحبه إسفين بلاقي حالو إنه دق بحاله إسفين!!! مثلاً بتحكي للمدير: 'ترى خالد طول نهاره بدخّن بالشركة (وطبعاً الدخان بالشركة ممنوع) والمشكلة إنّه دايماً بتسلبط عليّ وبدخن من بكيتي...'


7.إسفين طويل المدى:- وهذا الإسفين لا يطلقه إلاّ الخبثاء وهو على دفعات وقليل الجرعة بتضلّك ترمي أسافين صغيرة ومع الوقت بتتجمع عند مديرك إنه فلان الفلاني عليه مشاكل كثيرة ولازم نأدبه وهيك إنتا بتكون كإنك ما عملت إشي – تراكمات يعني – وهادا إسفين مضمون النجاح وقد أثبت فاعليته عند الشباب


8. إسفين موجّه بالأقمار الصناعيّة :- وهذا الإسفين ما إله علاج ولا مضاد حيوي لإنه إسفين من شخص واصل من فوق.. فالأفضل توخد حذرك من هيك أشخاص عشان تضمن حياة سعيدة هانئة بشركتك
ومثل ما إحنا شايفين تختلف الأسافين بنوعها وتأثيرها، بس من خبرتي إنو راح ييجي يوم أسود عليك تنردلّك كل أسافينك ووقتها حتبكي دم على أسافينك القديمة ولو سألتني بحكم خبرتي البسيطة شو علاج الأسافين فالعلاج هو الآتي:


1- عليك بتناول الكثير من فيتامين الوقاية ' فيتامين واو' (الواسطة) لإنها بتشكل جهاز ردع ضد المأسفنين

2- عليك بالإكثار من الحذر والخبث والتحفظ....ممكن ذلك يخفف فقط ولو إنه البعض يشكّك في ذلك ويقول: وداوِها بالتي هي الداء...يعني أسفن فيه الصبح قبل ما يأسفن فيك المساء

3- إمشي الحيط الحيط ودايماً إحكي حاضر ....ولا تحكي لأ....ومع ذلك برضه ح تتأسفن مش بكيفك مكتوب عليك الأسفنة خاوا

4- كل يوم صبّح على مديرك وإسأله: آآآآآه... شو الأخبار؟ إن شاء الله ما في أولاد حلال حكولك شو حكينا عنك مبارح؟؟؟


انت اعمل هيك و ما عليك
يا ولدي مطرود مطرود مطرود
الله يبعد عنا شر الاسافين و و المأسفنين

مهاجر

طيب انت بحياتك كلها كم اسفين عملت او ضربت او صنعت او انجزت او اخترعت يا ابو هادي



الحمد لله انا على الي اكلتهم من ملتي اسفين هههه

أمل المستقبل

مشكور ابو هادى على موضوعك
وبارك الله فيك

fatima

. الإسفين الموجّه ويتكون هذا الإسفين من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنتا من شطارتك أعطيته الفرصة ففقعك إسفين محترم
ياه يا ابو هادى انا كمان تعرضت لنفس الشىء من اتنين مش واحد بيضربونى فى نفس الوقت وانا ما كنتش عارفة حتى التقيت بشخص صعبت عليه من اللى بيتقال من وراى واتصل بى التقى بيه ومن تم اخبرنى كل شىء ساعتها فهمت اللى كان بيحصل من تم ماعدتش بتق فى اى حد

*rose*

7.إسفين طويل المدى:- وهذا الإسفين لا يطلقه إلاّ الخبثاء وهو على دفعات وقليل الجرعة بتضلّك ترمي أسافين صغيرة ومع الوقت بتتجمع عند مديرك إنه فلان الفلاني عليه مشاكل كثيرة ولازم نأدبه وهيك إنتا بتكون كإنك ما عملت إشي – تراكمات يعني – وهادا إسفين مضمون النجاح وقد أثبت فاعليته عند الشباب

الحضري

بتهيألي الشعب الفلسطيني اكتر شعب بيستخدم الاسافين

ابو هادي

الله يبعد عنا شر الاسافين
ما ظهر منها و ما بطن

نضال

مشكور ابو هادى على موضوعك