" كان حمد ابن 14 عاماً يوم خرج من قريته " البِـرْوِة " قضاء
عكا سنة 48 لاجئاً ، ولم يكن معه من حطــام الدّنيا سوى
شبّابة من قصب كان يشكلها تحت قشاطه ولم تكن مسدّساً !! "

يا ألله شُو بَحِنّ لَوادي شَعَبْ !
لَلتينْ وِالزيتونْ وِكْروم العِنَبْ !
لَكُلّ موقِعْ في الأرِضْ هونا وْغادْ
لَلقَبُو ، لَلنّبْعاتْ ، لَبير الخَشَبْ ،
لَرَمْيَه ، لَلْكَمَّانِه ، للميدانْ ،
لمغارة الشُّرْشُرْ براس الوادْ ،
لَيومْ كنّا وْلادْ ،
وِالدِّنيا شَتْوِيِّه ،
وْعَالجبلْ وِالمَرْج
الغيمْ يندفْ ثَلْجْ ،
عنْ رُوْسْنا نْكُتُّو مِثِلْ زُغْبُرْ ذُرَه ،
وْنُرْكُض نْوَلِّع نارْ ،
في مْغارةِ الشُّرْشُر نْوَلِّعْ نارْ !
*******************************************
وْكانْ ياما كانْ !
كانْ حَمَدْ لِحْسَيّان
هيكي وَلَدْ شَلْفُوحْ ،
لاجىءْ مع خْوانو
وْساكِنْ بِخُشِّه بْقريِة البِعْنِه ،
وْكان يِتْردَّدْ عَ أهل الدّير
قريتي دير الأسد ،
وِالناسْ من كَهْل وْوَلَدْ
كاتوا يِنِسْبُوه الكُلّ للبِرْوِه
وِيْقولوا : بَرْناوي ،
وِيْلَقّبوه إبن الجليل !!
*******************************************
وْياما وْياما كانْ !
ييجي حمد معنا ،
نحنا وْلاد الفَلّّحين ،
الحافيين لِمْشَرْتحينْ
يِسْرَح ويمرحْ بين حينْ وْحينْ
هيكْ في لِوْعورْ ،
شَنْدُو على بَنْدُو ،
وْشاكِلْ تِحِتْ لِقْشاطْ شُبَّابِه ،
قُصّيبِه من " وادي اللمونْ "
يَللي بْجَبَلْ كنعانْ في ديرِة صَفَدْ
وْشُو يِعِجْبَكْ إبن الجليلْ
شُبّابْتُو بِتْجاوِب ،
وْدَقَّاتْها مثل الذَّهَبْ ،
عَ السِّنّ وعَالشِّفِّه
يِلْعَبْ لُعُبْ ،
وِيْشَبّعَكْ فنّ وْطَرَبْ
وِيْدُقّّ كل شِيْ من غَناني بْلادْنا :
جَفْرَا ،
وْدَلْعونا ،
وْزريف الطُّولْ ،
وِكْثيرْ تتْهَنَّا
لما يْدُقّ شْروقي وِمْعَنَّى ،
أو نَفَسْ قَرَّادي ،
مثل دَقّ العود وِزْيادِه
وْلمّا يْقَسِّمْلَكْ أو يْميجِنْ
أو يْعَتِّبْلَك فْراقِيّاتْ
يْنَزِّل دْمُوعَكْ غَصِبْ عَنَّكْ !
*******************************************
قُلْتْ : ياما كانْ !
ييجي حمد معنا ،
نحنا وْلاد الفَلّحينْ ،
الحافيين لِمْشَلَّحينْ ،
وشو يِبِسْطَكْ إبنْ الجليلْ
وْهو جاي ماشي عْروضْ
هيكي بأرْض الشّولْ
وِالحِمْري عَ كْعابُو ،
وْحامِلْ عُبُطْ قندولْ ،
وْتِسْمَعُوا يْنادي :
يلاّ يا وْلاد يلاّ !
ولمّا يِصَلْ يِلْهَثْ عَ لِمْغارَه
يْزِتّ العُبُطْ عَ النارْ ،
وْمن قَدّ مافيها حَطَبْ خَرُّوبْ
الخايْرِه تْفاقِعْ شَرارْ ،
وْدُخَّانْها من باب لِمْغارَه
تْشوفو يُعْزُقْ للسّما العالي ،
وِمن الوَهَجْ وِالحَمّ
يِعْرَقْ علينا سَقِفْ لِمْغارَه ،
وْنِحْنا وْحمد نِلْتَمّ
وِتْشُوفوا وِالهُبَّالْ
طالِعْ من كْتافو
وْشبّابْتو تِرْشَحْ
نَغْماتْ عَ شْفافو
وْيِحْلالْنا نْبَلِّشْ معاه مْحورَبِه :
" هَرْبَجَتْ نار العربْ
شبابْ زِيْدُوها حَطَبْ
شبّابتكْ ياابن الجليلْ
مْوَلَّفِه غبِّ الطَلَبْ "
*************************************************
وْكانتْ يَ خُوي !
نَغْماتْ شبّابِةْ حمد
تْشِبّ مثل النارْ وِزْيادِه ،
وْبَرَّا لِمْغارَه شُو البَرِقْ يِشْلَعْ ،
وِالرَّعِدْ يِخْلَعْ ،
وِالسّيل يُهْدُرْ هَدِرْ في الوادي
مثلْ ما يُهْدُرْ جَمَلْ هايجْ
من جْمال عَمّي علي الدّرويشْ
وْهُو بْتِرْم الصًيفْ
يْشيلْ من خَلِّةْ عَمِرو
قَمِحْ هيتي والغِمِرْ جَنْب الغِمِرْ ،
وِالصوتْ شو يتركْ صَدَى
وْغيرْنا في هَالوَعَر مافي حَدَا
وْهَلّ النّدَى ،
وْصوت الحِدَا ،
قَدّيشْ يِحْلا بْهَالمدَى صوت الحِدا !
" هَرْبَجَتْ نار العربْ
شباب زيدوها حطبْ
شبّابتكْ يا ابن الجليلْ
في بلادْنا مالْها مثيلْ
من هونْ لأرْض الخليلْ
لَلْقِبِلْ لأرْض النَّقَبْ
شَمِّلْ بِدَرْبَكْ لَلشّمالْ
لَلشّام.. لَديرِةْ حَلَبْ
**********************************************
وْمن هَذاكِ اليومْ
وْحمد لِحْسيّان لَعَّابْ شبّابِه ،
دَقّاقْ في الأعراسْ ،
وْجاي يا هَالناسْ !
عِنْد دار فلانْ في طُلْبِه ،
وْعند دار فلانْ تعليلِه ،
وِتْشُوفْ جايِ ضْيوفْ
طَفِّه وَرَا طفِّه ،
وِالكُلّ معزومينْ عَ الزَّفِّه ،
وْييجي ثاني يومْ
لَمَّا العريسْ عَالكَرْم كان يْطوفْ
وِالِخْيول طْرادْ
العَجِّه تُوْصَلْ للسَّما ،
وِالكُلّ مبسوطينْ ،
وْيِرْجَعُوا بْسَحْجِه
وِالغَدَا ممدودْ ،
وِالنَّطُور يِنْدَه :
" العيشْ ياجوعان !
وِالمَيِّ يا عطشانْ " !
مبروك !!
وِالعاقْبِه للعُزْبانْ وِاللي عايزينْ !
ألله يعطيكو الجميعْ العافيِه !
وْيِسْلَمْ حمد !
وَالفَرْحَه ما بْتِكمَلْ بِدُونَكْ يا حمد !
العاقبِه لَوْلادْكو !
انشالله بِعُزْبانَكْ مْنِفْرَحْ ياحمد !
**********************************************
وْلمّا حمد هَدُّو المَرَضْ ،
ألله لايْمَرِّضْ حَدَا !
وْكِعْيُوا الدَّكاتْرَه وْسَلَّمُوا ،
بَكّيرْ هيكي راحْ ،
يَلْلي بَقَا ييجي
وْتيجي معو الأفراحْ ،
إبن الجليل الأوّلاني المعتمَدْ ،
لكنْ بِظَلّ إسمو وْذِكْرُوا يِنْحَمَدْ ،
وْمِشْ بَسّ أنا بَتْذَكَّرُو في غيبتو
بْتِتِذَكَّروا في غيبتو كلّ البلدْ ،
كَهْل وْولدْ ،
وِبْغيبتو بْتِتِذَكَّروا شبّابْتو
وْبِتْظَلّ عَ فْراقو حزينِه للأبَدْ !!

أمل المستقبل

مشكور عاشق وطن على ما قدمت
وبارك الله فيك

ابو جهاد

الله يعطيك الف عافية اخي عاشق وطن
أكثر من رائعة سلمت يداك

بحر الاحزان

ابدعت فى ما قدمت
عاشق وطن

فلسطينية

تسلم يداك عاشق وطن
على القصيدة الحلوة
و دمت بصحة و عافية

الحضري

مشكور حبيبي عاشق وطن

كل التحية لك

و ننتظر جديدك الحلو يا طيب

لحن الوفاء

مشكور عاشق وطن على ما قدمت
وبارك الله فيك

دلوعة جوزي

الله الله الله

يسلمو هالأيدين الي نقشتها ويسلم عمرك أخي الكريم ع هالموضوع

ودعني أزيد من الاهازيج

اهازيج فلسطينيه حزينه "من سجن عكا وطلعت جنازه"

مِنْ سِجِنْ عكا وطِلْعِت جَنازِة

محمَّدْ جمْجُومْ وفُؤادْ حجازي

جازي عليهُم يا ربِّي جازي

المنْدوبِ السّامي وربْعُه عِموما



محمّد جَمْجُومُ ومَعْ عطا الزِّيرِ

فؤادِ حْجازي عِزِّ الذَّخيرة

إنظُرْ لِمقدَّرْ(1) والتّقاديرِ

بَحْكامِ (2) المَوْلى تايِعدِمُونا



إمِّي الشّفوقة بالسِّجْنِ تنادي

ضاقَتْ عليها كُلِّ البلادِ

نادُوا فؤادْ ومُهْجِةْ فُؤادي

قَبِلْ نِتْفَرَّقْ تايِوَدِّعُونا



بابِ المحاكِمْ صاَحَتْ يا إبْني

تِدْعِي ع الحاكِمْ هاللي أتْعَبْني

والحاكِمْ ظالِمْ ما هُو مِعْجِبْني

وإعْدامِ الشّبابْ ما هو قانُونا



تِنْدَه (3) عَ عَطا من ورا البابِ

وِقْفَتْ تِستنظر مِنُّه (4) الجوابِ

عطا يا عطا زينِ الشبابِ

بِهْجِمْ عَ العَسْكَر ولا يهابونا



ثلاثة ماتُوا مُوتِ الإسُودِ

لا تِشْمَتْ فيهُم وَلَك يَهُودي

إحْنا بالْعَصا وانتَ بْبارودِة

بَسّك (5) تِتْشَكَّى ولكْ صهيونا



جابوا المُرْجيحَة (6) جابوالِحْبالِ(7)

هذه المُرْجيحَة شَرَفْناالعالي

وهذه المُرْجيحَة شرَفْنا الْعالي

شباب العَرَبْ لا تِهْتَمُّونا



حَبْسَك يا عَطا ما عُدْنا نْهابُو

ما دامِ الظُّلُم ظارِبْ اطنابُو

هذا وَطَنّا واحْنا إصْحابو

حِزْبِ الصَّهيوني قُوموا ارْحلونا



خَيِّ يا يوسفْ وصاتَك إمِّي

إوْعي يا أُختي بَعْدي تِنْهَمِّي

لأجْلِ الوَطَن هَدَرِتْ دَمِّي

كُلُّه عَلَشانِك يا فَلَسْطينا

رئيس المَجْلس(8) واحّنا رِجالَكْ

في نادي الأمَمْ ورجينا(9) افْعالَكْ

حافِظْ عَ الوَطَنْ أحْسَن وابْقى لَكْ

لا يقُوموا خانُوا العَرَبْ ياعْيونا

زُوروا المقابِر يومِ لعيادي

زُورُوا لي عَطا وزُوروا الأمجادي

أهل الشّجاعة عطا وفؤادي

ما يهابوا الرَّدى يومِ المنونا



شَرقيِّ القُدسْ صارَتْ مناحَة

سِمْعَتْها يافا طِلْعَت صَيّاحة

قالت يا قُدسْ يللّه يا ريحا(10)

نِعْلنْها ثوْرَة على صَهْيُونا



صَارَتْ في عكا يومِ الِعْدامِ (11)

مُصيبة كبيرة على العُربانِ

صَفُّوا العَساكر صفِّ النِّظامِ

خافوا من العَرَبْ لا يهْجِمونا



ضرْبِ المَدافِعْ (12) ما خفنا مِنّه

والمِقْدَّر جاري ما غنى عنُّه

والموتِ الَحْمَرْ (13) ما نِسْأل عَنُّه

يومِنْ رِدْناهُمْ ما يِمنَعُونا



طَلَبْنا العفو(14) ما سِمعُوا مِنّا

للشّهر العاشِرْ واحنا بْنِستَنّا

بَعَثنا الوَفد(15) ىِدافِعْ عَنّا

خابَتْ آمالُه ورِجِعْ مَغْبونا



يقُول مْحَمّد أنا أوَّلْكُم

خُوفي يا عطا أشْرَب حَسْرِتكُمْ

يقول حجازي أنا أوَّلْكُم

ما نْخافِ المَشَانِقْ لَوْ عَلَّقونا



فؤاد حْجازي أمْسِى مَفقودي

جُودي يا إمِّي بالبُكا جُودي

عَلَشان الوطن حَلَفْت اجودي

عَشان الوطن بيعلِّقونا



نادى المنادي يا ناس اضرابِ

يُومِ الثلاثا شنْقِ الشّبابِ

أهْلِ الشّجاعَة عَطا وفؤادي

ما يْهابوا الرَّدى ولا المَنونا

زَغٌرودَة لحظة الشنق

هي وْيا والمِشْنقَة تاجَك

هي والْقيد الَك خُلْخالْ

هي ومُوتَكْ عَن بلادَك عِزّ

هي ويا زِينْةِ الرِّجالْ