يمكن استغربتو من السؤال وما بعرف يا ترى بيخطر على بال حدا فينا وإذا صار وفكرنا فيه يا ترى شو جوابنا ؟؟؟!!!


كلنا بنعرف إنو الإنسان بيعيش حياته محسوبة عليه بالأعوام والأيام ،سواء كانت طويلة أم قصيرة... والساعات بتكر بسرعة من غير ما تتوقف ومن غيرما نحس بالزمن وبلحظة بينتهي العمر !!!بس يا ترى نحنا استعدينا لهاي اللحظة؟؟ عملنا شي يفيدنا ونكسب عن طريقه آخرتنا؟؟

مضى أمس كالماضي شهيدا معدلا
وأعقبه يوم عليك جديد

هاد بيت من الشعر معناتو إنو اليوم اللي بيمضي ما بيرجع ورح بيشهد علينا وما بنعرف شو حكملنا ربنا فيه وبكرا يعني يوم جديد والله أعلم إذا بنعيش لنشوفه أو لأ!!

ربنا خلقنا لنعبده ولنذكره ونسبحه مو لنضيع وقتنا على الملاهي اللي مافي أكتر منها..


قال رسول الله صلى الله عليه وسلم: " لا تزول قدما عبد يوم القيامة حتى يسأل عن أربع: عن عمره فيما أفناه وعن جسده فيما أبلاه وعن ماله من أين اكتسبه وفيما أنفقه وعن علمه ماذا عمل به" رواه الترمذي بإسناد صحيح ..
يعني لو ماكان مهم ما كان ربنا حيسألنا عنه...


أنا حبيت أحكيلكم عن أشياء بسيطة ممكن نستغل فيها وقتنا سواء كنا بندرس ولا بنشتغل ولا حتى فاضيين وقاعدين قدام الكمبيوتر ..شي بسيط لكن أجره عند الله كبير وعظيم ...



ذكر الله والتسبيح والتهليل والإستغفار ... خليها عادة يومية عنا على طول ويوم عن يوم ما رح نقدر ننساها أو نستغنى عنها أبدا... خصوصا وإنها من خير الأعمال وهي سبب في البركة برزقنا وحياتنا وكل شي بنعمله...


قال تعالى : " وأقم الصلاة إن الصلاة تنهى عن الفحشاء والمنكر ولذكر الله أكبر والله يعلم ما تصنعون ""

والأهم من هاد كله هو غفران الذنوب ...ومين منا ما عندو ذنب وبيتمنى من الله يغفرلو ياه... هاي أبسط طريقة لنرضي ربنا ونستغل وقتنا ونكسب حسنات بالملايين ونكفر سيئات بالملايين كمان...


قال تعالى : " والذاكرين الله كثيرا والذاكرات أعد الله لهم مغفرة وأجرا عظيما "سورة الأحزاب..آية 35

عن أبي هريرة رضي الله عنه قال:قال رسول الله صلى الله عليه وسلم: "كلمتان خفيفتان على اللسان ،ثقيلتان في الميزان،حبيبتان إلى الرحمن: سبحان الله وبحمده،سبحان الله العظيم " رواه البخاري ومسلم..


وعن جابر بن عبدالله رضي الله عنهما عن النبي صلى الله عليه وسلم قال: " من قال سبحان الله وبحمده غرست له نخلة في الجنة "

وفي كمان برنامج رائع للتسبيح إذا بتحبو تستفيدو أكتر ...
E-Sebha-11

يعني مهما كانت بسيطة لكنها عند الله عظيمة وبيكفي إنو لما ربنا يسألنا شو كنت تعمل بوقتك رح بيشهد عليك قلبك ولسانك وإيديك إنك كنت بتذكر الله وبتسبحه.. أفضل من إننا نقضيه ونحنا بنسمع أغاني أو نغتاب وننم بخلق الله ...


الموضوع أكبر من إني ألخصه بكلمتين لكن اللي بيهمني إنو تكون الفكرة وصلت وأذكر بهالشي ..فالذكرى تنفع المؤمنين...
بتمنالكم الفائدة ...


دع الأقدار تفعل ما تشاء...ولا تسأل عن غد...فإنه في علم رب السماء...

مع تحيات $البرنسيسه$